MANIFIESTU POR UN GOBIERNU MUNICIPAL AL ALTOR DE LA SO XENTE
Los y les embaxo firmantes, miembros de Podemos Xixón, queremos manifestar el nuesu
fondu pesar cola situación de paralís que ta sufriendo la nuesa ciudá. L'actual gobiernu de
Foro escarez de llexitimidá democrática, dáu'l so incumplimientu constante y repitío de los
alcuerdos alcanzaos nel plenu.
Nun sabemos si esto debese a la so incompetencia o por manifiestu desalcuerdu colos
mesmos dada la so condición de minoría, pero la realidá ye que gran parte de les midíes
aprobaes nun son llevaes a cabu nin executaes per parte del gobiernu. Esto yá supunxo
que, nel casu de los presupuestos participativos y execución d'obres comprometíes colos
Conseyos de Distritu, la Federación d'Asociaciones de Vecinos urbana protagonizara un
plantón frente al gobiernu pola so inactividá.
El llistáu d'incumplimientos ye llargu. Resalten casos tan sangrantes como la
remunicipalización de l'ayuda a casa, el desenvolvimientu de planes d'actuación comuñal
integral, el plan de participación ciudadana, la construcción del campu fútbol femenino, la
cubierta de la pista del colexu de Cimavilla, les infraestructures d'accesu al barriu de
Nuevo Roces, el bonotaxi para les persones con movilidá amenorgada o´l plan CES para la
xestión de les colonies felines. Los grupos políticos siguen aprobando propuestes que
nunca van ver la lluz.
Dende la derecha radical acusan a Foro de tar “podemizándose”. Llueñe d'esto, ta
amosando la so cara más reaccionaria y antipopular. Puntualmente resúlta-y imposible
nun aceptar les propuestes que realiza Xixón si Puede, que se caracteriza por ser el grupu
municipal que más iniciatives lleva al plenu pero, si nun s'executen, de nada sirve tou esti
trabayu. Per otra parte, Foro portarse de manera engañosa al nun executar lo aprobao nos
plenos, pos sabe qu'esto va causar cansanciu nes bases de Podemos y de XSP al ver la falta
d'efectividá de l'acción municipal.
En temes económicos Foro sigue atacando a les clases populares y ta apostando por xubir
les tases a la ciudadanía nel PDM pero caltener el IBI a les grandes superficies, camín nel
que s'atopó col PSOE. Nosotres defendemos que quien más tien más paga, d'ende la
necesidá d'una regulación progresiva de los impuestos, y nun entendemos l'astención de
Xixon si Puede nesti aspeutu. Si esti camín sigue va ser imprescindible oponese a los
presupuestos, pos son tan importantes los ingresos como en qué se distribúin los gastos.
Ante esta situación vemos necesaria una campaña de denuncia pública y constante d'estos
incumplimientos, endureciendo'l discursu contra un gobiernu inútil qu'empieza a amosar
la so verdadera cara censora, cola suspensión d'actos públicos d'alderique de manera
cobarde y mentirosa.
Podemos y Xixón Sí Puede tienen de liderar la rempuesta ciudadana contra los ataques de
Foro a les clases populares, l'esmantelamientu de la economía de Xixón, la degradación de
los barrios y el despreciu al mediu ambiente. La nuesa ciudá merezse un gobierno meyor.
Nun queremos un gobiernu incapaz, mentirosu y que crea problemes en llugar de
resolvelos. Queremos un Conceyu de Xixón al altor de la so xente.